O nome do espírito da colmea nace como unha homenaxe ao rural e as abellas, referenciando os valores da comunidade, tan unidos ao rural, onde a comunidade sostén a vida e o traballo no campo, como as abellas que traballan como un ser único. O mel é unha redución da esencia dos lugares que habitan as abellas, por iso un dos principios fundamentais é o coidado da paisaxe que nos alimenta. Coidar da paisaxe é ao final coidar da saúde das persoas con produtos de calidade. 

O meu nome é Natalia. Descubrín o mundo das abellas despois de atoparme un enxamio que vivía nas paredes do muíño do meu avó. Desta casualidade naceu a decisión de colocar unha colmea nese lugar e así comezou o meu amor polas abellas. Despois de 10 anos de aprendizaxe dos ritmos e do funcionamento das colmeas, decidinme lanzarme a ser apicultora profesional, e crear a marca de produtos apícolas “o espírito da colmea”. Unha iniciativa que se desenvolve ao redor da protección da natureza.